Óskað eftir umsóknum um styrki í nýjan vinnuverndarsjóð – umsóknarfrestur til 12. desember

Frestur til að skila inn umsóknum í sjóðinn hefur verið framlengdur til 12. desember.

Áhugasöm eru hvött til að kynna sér nánar reglur um úthlutun styrkja úr Vinnuverndarsjóði en við mat á umsóknum verður einkum litið til verkefna og rannsókna er varða:

• tengsl einstakra sjúkdóma og vinnutengdra einkenna við vinnuumhverfi
• samfélagslegan og efnahagslegan ávinning af vinnuvernd
• orsakir, tíðni og þróun vinnuslysa í ákveðnum starfsgreinum
• jákvæða ímynd og viðhorf almennings til vinnuverndar
• vitundarvakningu einstakra hópa á vinnumarkaði um vinnuvernd, svo sem starfsfólks sem skilur ekki íslensku, ungs fólks og starfsfólks er sinnir áhættusömum störfum.
• þekkingu á mikilvægi góðrar vinnustaðamenningar
• tengsl slæmra vinnuskilyrða og fjarveru starfsfólks
• aukna vitund almennings um vinnutengda kulnun og hvernig megi fyrirbyggja hana
• nýsköpun á sviði vinnuverndar
• viðbrögð við áhrifum aukinnar sjálfvirkni og tæknivæðingar á vinnuumhverfið
• áhrif samþættingar fjarvinnu og vinnu á vinnustað á vinnuvernd

Við fyrstu úthlutun sjóðsins verður lögð sérstök áhersla á verkefni og rannsóknir er varða tengsl einstakra sjúkdóma og vinnutengdra einkenna við vinnuumhverfi.

Í umsókn skal eftirtalið koma fram:

• Almennar upplýsingar um umsækjanda, nafn verkefnisstjóra og annarra þátttakenda og samstarfsaðila, ef einhverjir eru
• Upplýsingar um menntun og fræðilegan bakgrunn umsækjanda og upplýsingar um fyrri verkefni sem tengist vinnuvernd
• Hnitmiðuð lýsing á verkefninu, markmiðum þess og þýðing
• Tímaáætlun og lýsing á aðstöðu þátttakenda til að vinna verkefnið;
• Hvernig staðið verði að stjórnun verkefnis
• Upplýsingar um nýnæmi og gildi verkefnis og stöðu þekkingar á viðfangsefninu, þ. á m. hvers er vænst að verkefnið muni bæta við þá þekkingu
• Verkáætlun, lýsing á aðferðafræði, áfangaskiptingu og helstu verkþáttum
• Greinargóðar upplýsingar um áætlaðan kostnað við verkefnið
• Hvernig staðið verði að bókhaldsumsjón með verkefninu
• Upplýsingar um hvort sótt hafi verið um aðra styrki fyrir sömu umsókn

Gæði rannsóknar- eða verkefnaáætlunar ásamt vísindalegu gildi, nýmæli og mikilvægi er lagt til grundvallar við mat á styrkhæfi umsókna auk menntunar og hæfis umsækjenda.

Stjórn sjóðsins annast mat á umsóknum um styrki en hana skipa fulltrúar frá Alþýðusambandi Íslands, Samtökum atvinnulífsins og Vinnueftirlitinu.

Vinnuverndarsjóður hefur 10 milljónir króna til úthlutunar á árinu 2023.

Hámarksstyrkur til einstaks verkefnis er 4 milljónir króna.

Umsóknir sendist á vinnueftirlit@ver.is. Óska má eftir nánari upplýsingum í gegnum sama netfang.