Áætlun um heilsuvernd og forvarnir
Í stuttu máli
Gefi áhættumat á vinnustað til kynna að heilsu og öryggi starfsfólks sé hætta búin, skal atvinnurekandi þegar í stað grípa til nauðsynlegra fornvarna og gera ráðstafanir til að draga úr hættu með áætlun um heilsuvernd og forvarnir. Hún er hluti af áætlun um öryggi og heilbrigði á vinnustað.
Tímastett áætlun um forvarnir
Þegar áhættumat liggur fyrir þarf að gera tímasetta áætlun um forvarnir og ráðstafanir sem byggir á áhættumatinu.
Mikilvægt er að forgangsraða ráðstöfunum út frá alvarleika þeirrar áhættu sem verið er að koma í veg fyrir. Þegar störf eru beinlínis hættuleg er ekki forsvaranlegt að bíða með að grípa til nauðsynlegra ráðstafana.
Nánar um tímasetta áætlun um úrbætur
Neyðaráætlun
Neyðaráætlun lýsir ráðstöfunum vegna skyndihjálpar, slökkvistarfs og brottflutning starfsfólks komi upp neyðartilvik. Hún þarf að vera í samræmi við eðli starfseminnar og stærð vinnustaðar. Í henni þurfa auk þess að vera upplýsingar um það starfsfólk sem hefur skilgreint hlutverk við framkvæmd neyðaráætlunarinnar, þjálfun þess og búnað.
Endurmat
Meta skal árangur þeirra ráðstafana sem gerðar hafa verið til verndar starfsfólki að ákveðnum tíma liðnum og gera endurbætur ef þörf krefur. Tilgreina skal hvenær áætlað er að eftirfylgni með ráðstöfunum fari fram.
Eins þarf að endurskoða reglulega áætlun um öryggi og heilbrigði í heild eða að hluta og ávallt eigi breytingar sér stað. Er þá átt við bæði áhættumatið og áætlun um heilsuvernd og forvarnir. Mælt er með að regluleg endurskoðun fari fram árlega.
Þjónustuaðili
Vinnueftirlitið